Diploma Lefel 3 VTCT mewn Tylino

Prif ganlyniad Diploma NVQ Lefel 3 VTCT mewn Therapi Harddwch Tylino yw cadarnhau eich gallu mewn swydd therapydd harddwch tylino. Mae'r holl unedau yn y cymhwyster hwn yn ymwneud yn uniongyrchol â swydd benodol therapydd harddwch tylino.

Mae’r Diploma NVQ Lefel 3 VTCT mewn Therapi Harddwch Tylino yn gymhwyster galwedigaethol sylweddol a fydd yn cadarnhau eich cymhwysedd fel therapydd harddwch tylino. Mae’r cymhwyster hwn yn rhan o fframwaith brentisiaeth, fodd bynnag mae rhai o’r triniaethau a wneir yn y cymhwyster hwn yn ddarostyngedig i gyfyngiadau oedran mewn rhai rhanbarthau, lle mae trwyddedu triniaeth arbennig cyngor lleol yn berthnasol. Mae cyflogwyr yn ystyriol o natur sensitif y gwasanaethau ac oherwydd hyn, efallai mai nifer cyfyngedig o brentisiaethau harddwch tylino sydd ar gael. Am y rheswm hwnnw, mae darparwyr addysg a hyfforddiant yn cynnwys y Diploma NVQ Lefel 3 VTCT mewn Therapi Harddwch Tylino ar wahân i brentisiaethau. Maent yn gallu cynnig y cwrs hwn mewn amgylchedd sba go iawn, ac yn gallu darparu’r cyfle i chi ddysgu sgiliau harddwch tylino a gweithio gyda chleientiaid go iawn. Mae’n bwysig eich bod yn cael cyfle i ddysgu mewn amgylchedd gwaith go iawn, yn enwedig gan fod y cymhwyster hwn yn arwain at weithio mewn sector sy’n canolbwyntio ar gleientiaid a darparu gwasanaeth.

Mae’r cymhwyster hwn wedi ei lunio i ddysgwr 16 oed neu hŷn, a bydd yn eich cynorthwyo i gael cyflogaeth fel therapydd harddwch tylino, gan fod unedau’r cymhwyster hwn yn ymdrin â’r holl sgiliau a gwybodaeth a fydd eu hangen ar gyfer y swydd hon. Gallwch ddechrau ar y cwrs os ydych wedi cyflawni cymhwyster Lefel 2 mewn therapi harddwch yn y gorffennol a/neu brawf sgiliau a chyfweliad llwyddiannus.

Dyma gymhwyster galwedigaethol sy’n cynnwys yr holl elfennau sydd eu hangen i weithio’n effeithiol fel therapydd harddwch tylino, gan gynnwys unedau gorfodol sy’n cynnwys y canlynol: tylino’r corff, tylino pen Indiaidd, a thylino gan ddefnyddio olewon wedi’u cymysgu’n barod, therapi cerrig, monitro dulliau gweithredu yn y salon a chyfrannu at ddigwyddiad hyrwyddo.

Byddwch chi hefyd yn cael y cyfle i feithrin eich dealltwriaeth a’ch sgiliau ymhellach drwy ddewis nifer o unedau dewisol therapi harddwch, sy’n cynnwys: gwasanaethau colur brwsh aer, cwyro mannau preifat y corff, estyniadau sengl blew’r amrannau, lliw haul UV, rhoi lliw haul ffug ar eich hun, triniaethau trydanol i’r corff. Mae strwythur y cymhwyster hwn yn rhoi’r hyblygrwydd i chi feithrin y wybodaeth, y ddealltwriaeth a’r sgiliau sydd eu hangen i weithio mewn swydd therapydd harddwch tylino.

Trwy gydol y cymhwyster hwn, byddwch chi’n cynyddu eich gwybodaeth a’ch dealltwriaeth o’r anatomi a ffisioleg berthnasol, iechyd a diogelwch, a gofal cleientiaid. Byddwch chi’n datblygu amrywiaeth o sgiliau technegol tylino, gan ddefnyddio amrywiaeth o dechnegau gwahanol. Byddwch chi’n meithrin sgiliau rhyngbersonol hefyd, a fydd yn eich galluogi chi i gyfathrebu’n effeithiol gyda chleientiaid.