Astudiaethau Cyfryngau - Lefel A

Uned 1: Ymchwilio i’r Cyfryngau
Bydd dysgwyr yn astudio tair elfen yn yr uned hon, gan ddatblygu eu gwybodaeth a’u dealltwriaeth am y cysyniadau allweddol yn astudiaethau’r cyfryngau – iaith y cyfryngau, diwydiannau’r cyfryngau a’r cynulleidfaoedd – a’u defnyddio fel fframwaith ar gyfer dadansoddi’r cyfryngau.

Y meysydd i’w hastudio yw:
● Delweddau Gwerthu – Hysbysebu a Fideos Cerddoriaeth
● Newyddion yn yr Oes Ar-lein
● Diwydiannau ffilm – o Gymru i Hollywood.

Bydd dysgwyr yn ymchwilio i’r meysydd hyn trwy ddadansoddi a chymharu amrediad o gynhyrchion y cyfryngau’n fanwl, gan ystyried agweddau megis eu defnydd o iaith y cyfryngau, nodweddion genre a naratif a’r cynrychioliadau a gynigir. Bydd dysgwyr yn astudio rôl diwydiannau’r cyfryngau yn siapio cynnyrch y cyfryngau, yn ogystal ag ystyried y modd y targedir cynulleidfaoedd a sut maent yn dehongli’r cyfryngau.


Uned 2: Creu Cynhyrchiad Cyfryngol
Mae’r uned hon yn ei gwneud yn ofynnol i ddysgwyr ddatblygu a defnyddio eu gwybodaeth a’u dealltwriaeth am gysyniadau’r cyfryngau i gynhyrchu cynnyrch ymarferol.

Bydd dysgwyr yn cwblhau’r isod:
● Gwaith ymchwil a chynllunio
● Cynhyrchu
● Dadansoddi a myfyrio ar sut mae’r cynrychioliadau wedi’u llunio a sut y defnyddiwyd confensiynau i dargedu’r gynulleidfa benodol.


Uned 3: Y Cyfryngau yn yr Oes Fyd-eang
Yn yr uned hon mae’n ofynnol i ddysgwyr astudio amrediad o ffurfiau cyfryngol gwrthgyferbyniol yn fanwl, gan ymchwilio i’r holl gysyniadau allweddol – iaith y cyfryngau, cynrychioliadau, diwydiannau’r cyfryngau a chynulleidfaoedd.

Y meysydd i’w hastudio yw:
● Teledu yn yr Oes Fyd-eang
● Cylchgronau: Prif Ffrwd a Chyfryngau Amgen
● Y Cyfryngau yn yr Oes Ddigidol – Gemau Fideo

Bydd dysgwyr yn ymchwilio’r meysydd hyn trwy ddadansoddi a chymharu cynhyrchion y cyfryngau’n fanwl, gan ystyried sut mae cynrychioliadau grwpiau cymdeithasol a diwylliannol wedi’u llunio trwy iaith y cyfryngau. Mae cyd-destun yn rhan bwysig o’r rhan hon o’r astudiaeth hefyd. Bydd dysgwyr yn datblygu dealltwriaeth o sut mae cyd-destunau cymdeithasol, diwylliannol, hanesyddol a diwydiannol perthnasol yn siapio cynnyrch y cyfryngau.


Uned 4: Creu Cynhyrchiad Traws-gyfryngol
Mae’r uned hon yn adeiladu ar y dysgu blaenorol trwy ei gwneud yn ofynnol i ddysgwyr ddatblygu a defnyddio eu gwybodaeth a’u dealltwriaeth am y cyfryngau trwy gynhyrchiad traws-gyfryngol ymarferol. Yn yr Uned Safon Uwch hon bydd pwyslais datblygu’r cynhyrchiad ar waith ymchwil trwyadl.

Bydd dysgwyr yn cwblhau’r isod:
● Gwaith ymchwil manwl
● Amlinelliad datblygiad, yn dangos sut y bydd y gwaith ymchwil yn dylanwadu ar eu cynhyrchiad
● Dadansoddiad beirniadol o sut y cafodd cysyniad cyfryngol allweddol yr ymchwiliwyd iddo ei gymhwyso yn y cynhyrchiad.