Cemeg - Lefel A

Mae Cemeg yn ymwneud ag astudio deunyddiau, eu nodweddion, adweithiau a’u defnyddiau. Bydd pob myfyriwr sy’n astudio Cemeg yng Ngholeg Cambria yn cael eu hannog i feithrin eu sgiliau personol a threfniadol trwy eu dysgu ac i anelu at gyflawni eu potensial academaidd.

Mae elfen ymarferol fawr i’r cwrs ac mae’r theori a gwaith ymarferol wedi eu hintegreiddio’n dda. Bydd y myfyrwyr yn gweithio’n annibynnol ac fel rhan o grŵp gyda’r rhain. Mae ein myfyrwyr Cemeg hefyd yn mwynhau cymryd rhan mewn profiadau cysylltiedig fel cystadlaethau Dadansoddwr Ifanc y Gymdeithas Gemeg Frenhinol, Cwis Chemnet, gweithdai sbectrosgopeg, dosbarthiadau meistr prifysgolion a Chymdeithas Wyddoniaeth a Mathemateg Pennant.

Ar ôl cwblhau’r cwrs yn llwyddiannus bydd y myfyrwyr wedi magu hyder mewn rhyngweithio ag eraill; byddant yn gallu rhesymu’n rhesymegol a byddant wedi meithrin yr arfer gwerthfawr o ddulliau a diogelwch ymchwiliol wrth weithio dan amodau labordy.

Mae'r cwrs UG / Safon Uwch Cemeg yn dilyn manyleb CBAC ac mae'n adeiladu ar y pynciau a astudiwyd ar gyfer TGAU. Mae'r Lefel UG yn cynnwys dwy uned sy'n cael eu harholi ar ddiwedd y flwyddyn gyntaf. Mae tair uned ychwanegol yn cael eu hastudio gan y myfyrwyr hynny sy'n dymuno ennill cymhwyster Safon Uwch llawn yn ail flwyddyn y cwrs. Mae un o unedau’r ail flwyddyn yn cynnwys arholiad ymarferol. Mae crynodeb o gynnwys y cwrs ar gael isod.

Uned 1: Iaith Cemeg, adeiledd mater ac adweithiau cemegol. Fformiwlâu a hafaliadau, strwythur atomig, cyfrifiadau, bondio, adeileddau solidau, dosbarthiad elfennau yn y Tabl Elfennau, ecwilibria ac adweithiau asid-bas.

Uned 2: Egni, cyfraddau adweithio a chemeg cyfansoddion carbon. Dadansoddiad thermocemegol a chinetig, effaith ehangach cemeg mewn cymdeithas, cyfansoddion organig gan gynnwys hydrocarbonau, halogenoalcanau, alcoholau ac asidau carboscilig, defnyddio offer i ddadansoddi.

Uned 3: Cemeg Ffisegol ac Anorganig. Rhydocs a photensial electrod safonol, cemeg y blociau p a d, newidiadau enthalpi, entropi a dichonoldeb adweithiau, cysonion ecwilibriwm, ecwilibria asid-bas

Uned 4: Cemeg organig a dadansoddi, stereoisomeredd, aomatigedd, alcohol a ffenol, aldehydau a chetonau, asidau carbocsilig a'u deilliadau, aminau, asidau amino, peptidau a phroteinau, synthesis organig a dadansoddi.

Uned 5 – Uned Gemeg Ymarferol:- yn ogystal â’r ymarferion ymarferol penodol gan CBAC, byddwch yn ymgymryd ag ystod eang o waith ymarferol i ategu’r unedau theori. Bydd gofyn i fyfyrwyr gadw ffeil drefnus o’u gwaith labordy i baratoi ar gyfer asesiad yr uned hon.