Drama ac Astudiaethau Theatr - Lefel A

Mae'r rhaglen astudio Drama Safon Uwch yn heriol, yn werth chweil a difyr ac mae'n cynnig profiad gwerthfawr i chi os oes gennych chi ddiddordeb brwd a dawn yn y maes pwnc hwn.

Mae Astudiaethau Drama a Theatr yn rhoi cyfle i chi ddyfnhau ac ehangu eich dealltwriaeth o faes y pwnc ac i feithrin hyder a sgiliau cyfathrebu a chyflwyno hefyd.

Yn ystod blwyddyn 1, byddwch chi’n dod i ddeall perfformiadau byw a’u dadansoddi, astudio testun gosod a pherfformio darn wedi’i sgriptio neu ddylunio gwisg, goleuadau a’r set.

Ym mlwyddyn 2 byddwch chi hefyd yn deall perfformiadau byw a’u dadansoddi. Byddwch chi hefyd yn astudio dau destun gosod gan ddadansoddi ac edrych arnyn nhw trwy lygaid cyfarwyddwr, perfformiwr a dylunydd.

Os ydych chi’n ymgymryd â’r elfen perfformio, byddwch chi hefyd yn creu darn o ddrama wreiddiol yn ogystal â pherfformio testun gosod. Os ydy tu ôl i'r llenni yn fwy dymunol i chi, gallwch chi ddewis yr elfen ddylunio a threfnu'r gwisgoedd, y goleuadau neu ddyluniad y llwyfan ar gyfer y perfformiadau hyn. Bydd gofyn i chi fynd i berfformiadau theatr yn rheolaidd.