Hanes - Lefel A

Blwyddyn 1: Gwleidyddiaeth, protest a diwygio yng Nghymru a Lloegr 1880-1980 (Yr astudiaeth o gyfnod)

Mae'r uned hon yn cynnwys pum pwnc:
1. Graddau’r newid mewn cymdeithas 1880-1951
2. Sefyllfa pleidiau gwleidyddol yn newid 1880-1951
3. Effaith y rhyfel ar gymdeithas yng Nghymru a Lloegr 1902-1951
4. Arwyddocâd prif ddatblygiadau yng Nghymru a Lloegr 1918-1980
5. Rôl merched yn newid 1990-1980

Mae’r cyfnod hwn ym Mhrydain yn un sydd o ddiddordeb mawr I haneswyr. Mae’n astudio Prydain yn y cyfnod modern, gan edrych ar bynciau sy’n berthnasol iawn hyd heddiw. Mae’r pwnc effaith y rhyfel yn edrych ar Ryfel y Boer yn ogystal â’r ddau Ryfel Byd ac ystyried effaith gymdeithasol ac economaidd bob rhyfel. Mae'r cysyniad o les yn cael ei astudio'n fanwl gan ystyried Diwygiadau Rhyddfrydol a Llafur. Mae ffasiwn, cerddoriaeth a mudiadau poblogaidd y 50au, 60au a 70au yn ogystal â rôl merched yn newid, yn bynciau poblogaidd sy'n ennyn diddordeb y myfyrwyr mewn trafodaeth fywiog.

UG: Yr Almaen Weimar, c1918-1933 (Yr astudiaeth fanwl)

Bydd yr elfennau canlynol o Weimar yn cael eu harchwilio, materion a digwyddiadau cymdeithasol, economaidd a gwleidyddol yn ystod y cyfnod yn yr Almaen o 1918 hyd at 1933. Bydd y dadansoddi yn canolbwyntio ar ba mor llwyddiannus fu llywodraethau Weimar wrth geisio sefydlogi gwleidyddiaeth a’r economi. Yn gysylltiedig â hynt a helynt y cyfnod Weimar, byddwn yn ystyried esgyniad Hitler a thwf y Blaid Natsïaidd. Byddwn yn ystyried arweinyddiaeth, ideoleg y Natsïaid, trefniadaeth y blaid, propaganda, y SA a’r SS, a natur yr etholaeth. Bydd gwerthusiad o ddehongliadau cystadleuol o faterion allweddol yn hanfodol fel: ‘Pam wnaeth y Parti Natsïaidd dyfu mor gyflym yn y cyfnod rhwng 1929 a 1933?’, ‘Oedd cwymp Gweriniaeth Weimar yn anochel?’

Blwyddyn2:

Mae’r rhan Safon Uwch yn cynnwys tair elfen: Y modiwl cyntaf yw’r astudiaeth eang sy’n ystyried gwrthryfeloedd, bygythiadau a phrotestiadau cyfnod y Tuduriaid, yn ogystal â chyflwr tlodi a chrwydraeth rhwng 1485 a 1603. Mae’r ail fodiwl yn astudio’r Trydydd Reich mewn manylder, 1933-1945 gan adolygu’r Natsïaid yn rheoli ac effaith hynny yn yr Almaen a ledled Ewrop. Y trydydd modiwl yw’r asesiad di-arholiad, sy’n ddarn ysgrifenedig estynedig 3000-4000 o eiriau (20% o’r cymhwyster Safon Uwch).