Lefel 4 Cenedlaethol Uwch Flex - Uned 7: Tirfesur, Mesur a Gosod

Mae'r cymhwyster Lefel 4 Cenedlaethol Uwch - Uned 7 Tirfesur, Mesur a Gosod yn cynnig cyfle i ddysgwyr ennill 15 credyd ar Lefel 4, sy’n cael ei ddyfarnu gan Pearson. Gall y credydau hyn gyfrannu tuag at Dystysgrif Genedlaethol Uwch (HNC) lawn mewn Peirianneg Sifil (cyfanswm o 120 credyd).

Mae astudio trwy HN Flex yn cynnig dull hyblyg o ddysgu i ddysgwyr a chyflogwyr, gan ei wneud yn ffordd wych o gymryd y cam cyntaf i Addysg Uwch. Mae'n rhoi cyfle i ddysgwyr deilwra eu profiad dysgu i weddu i'w diddordebau a'u nodau eu hunain. Mae hyn yn ei gwneud yn ddewis delfrydol i'r rhai sy'n edrych i archwilio potensial addysg uwch, gan ddatblygu gwybodaeth a sgiliau hanfodol yn y maes adeiladu ar yr un pryd â gwneud cynnydd tuag at gymhwyster HNC llawn.

Drwy gwblhau'r uned hon yn llwyddiannus, bydd dysgwyr yn cael cyfle i wella eu gwybodaeth a'u sgiliau, gan osod sylfaen gref ar gyfer twf academaidd a phroffesiynol yn y dyfodol yn y sector adeiladu.

Dull Addysgu:

Mae addysgu ar gyfer yr uned hon yn cyfuno darlithoedd ffurfiol gyda chymorth ymarferol, gan gynnwys gwaith labordy, profi deunyddiau, arolygu gwaith maes, teithiau maes, ymweliadau safle, a gweithgareddau darlunio a dylunio ymarferol.

Rhagor o wybodaeth am yr uned:

Mae tirfesur yn swyddogaeth hanfodol yn y diwydiant adeiladu, gan ddarparu gwasanaethau trwy gydol cylch bywyd prosiect. Mae'n dechrau gyda chasgliadau o ddata cychwynnol i seilio'r dyluniad arno, yna'n symud ymlaen i reolaeth leoliadol ar y broses adeiladu ac yn olaf yn cofnodi'r lleoliad 'fel cafodd ei adeiladu' i’w gymharu â'r dyluniad. Mae hefyd angen monitro effeithiau andwyol i'r amgylchedd cyfagos. Yr agwedd sy'n clymu pob un o'r swyddogaethau hyn ydy'r rhwydwaith rheoli, sy'n ffurfio'r sail ar gyfer pob mesuriad, ac mae hwn yn elfen barhaus trwy'r uned. Yn ymarferol, mae swyddogaethau tirfesur yn cael eu rhannu rhwng y 'Syrfëwr Tir' i sefydlu'r cyfeiriad lleoliadol a darparu data topograffig, a'r 'Peiriannydd Sifil' i ddarparu rheolaeth ar adeiladu (gosodiadau) a monitro. Gan fod yna ddibyniaeth a chyffredinrwydd rhyngddynt, mae'r uned hon yn cwmpasu'r ddau gyd-destun yn gyfartal. Yn yr uned hon, bydd myfyrwyr yn archwilio'r technegau sy’n cael eu defnyddio i sefydlu rheolaethau a chynnal arolygon cychwynnol, gan gynnwys cyfathrebu canlyniadau a dulliau o osod yr amgylchedd adeiledig. Bydd myfyrwyr yn gallu adnabod a dadansoddi'r ffynonellau o gamgymeriadau a thechnegau lliniaru sy'n cael eu defnyddio mewn agweddau cyffredin ar arolygu.