Daniel Edwards, dysgwyr blwyddyn gyntaf Safon Uwch, cyn-ddisgybl Ysgol Uwchradd Sant Joseph yw Aelod etholedig Wrecsam o Senedd Ieuenctid y DU (UKYP) a’r unig gynrychiolydd o Ogledd Cymru. Mae Daniel yn astudio Llywodraeth a Gwleidyddiaeth, Llenyddiaeth Saesneg a Hanes yn Chweched Iâl Coleg Cambria.

Yn ddiweddar, rhoddodd Daniel araith ddwyieithog bwerus o’r blwch dogfennau yn Nhŷ’r Cyffredin, gan agor y ddadl genedlaethol ar iechyd pobl ifanc yn ystod eisteddiad blynyddol Senedd Ieuenctid Prydain.

Aeth i’r afael â materion allweddol sy’n effeithio ar bobl ifanc heddiw, gan gynnwys amseroedd aros y GIG, camddefnyddio sylweddau, ymwybyddiaeth o iechyd meddwl, a’r angen am weithwyr proffesiynol llesiant hyfforddedig ym mhob ysgol, a galwodd am ragor o fuddsoddiad i gefnogi pobl “o’r crud i’r bedd,” gan adleisio geiriau Aneurin Bevan.

Gan ddisgrifio’r foment fel “braint enfawr,” dywedodd Daniel: “Mae Senedd Ieuenctid y DU yn dod â phobl ifanc at ei gilydd i greu newid ystyrlon. Mae ein lleisiau’n haeddu cael eu clywed, eu parchu a gweithredu arnyn nhw.

“Roeddwn i’n nerfus iawn, ond roedd yn foment bythgofiadwy sefyll lle safodd cynifer o ffigurau gwleidyddol arwyddocaol – gan gynnwys Aneurin Bevan – ar un adeg.

“Roedd yn fraint enfawr. Mae iechyd yn fater sy’n bwysig iawn i mi, ac roedd gwasanaethu ar y pwyllgor hwnnw’n ei gwneud hi’n anrhydedd siarad ar y pwnc.”

Ers dechrau ei dymor dwy flynedd ym mis Mawrth 2024, mae Daniel wedi bod yn rhan o ymgyrchoedd mawr fel Pleidleisio yn 16 Oed, Llythrennedd Gwleidyddol, a gwella addysg wleidyddol mewn ysgolion. Mae’n gobeithio dilyn dyfodol mewn gwleidyddiaeth, ond yn gyntaf mae eisiau profiad ehangach, o bosibl mewn gwaith ieuenctid, newyddiaduraeth neu hanes.

Dywedodd Mel Henry, Cyfarwyddwr Cwricwlwm a Dirprwy Bennaeth Chweched Iâl: “Rydyn ni’n hynod falch o Daniel. Mae wedi dangos aeddfedrwydd, hyder ac angerdd eithriadol. Mae ei ymrwymiad i gynrychioli pobl ifanc yn lleol ac yn genedlaethol yn ei wneud yn llysgennad rhagorol i’r coleg ac i Ogledd Cymru.”

Ychwanegodd Tricia Jones, Gweithiwr Cymorth Ieuenctid yng Nghyngor Wrecsam a chydlynydd Senedd yr Ifanc Wrecsam: “Gwnaeth Daniel waith gwych yn agor y ddadl ar iechyd yn Nhŷ’r Cyffredin. Mae wedi dangos ymroddiad gwirioneddol i sicrhau bod gan bobl ifanc Wrecsam lais cryf a pharchus ar blatfform cenedlaethol.”

Mae Chweched Iâl yn cynnig amgylchedd cynhwysol, arddull prifysgol lle mae dysgwyr yn cael eu trin fel oedolion ifanc a’u cefnogi i ddatblygu annibyniaeth. Gyda’r dewis mwyaf yn yr ardal o dros 30 o bynciau Safon Uwch – ochr yn ochr â Bagloriaeth Sgiliau Uwch Cymru – a gyflwynir gan arbenigwyr pwnc, ynghyd â chefnogaeth ehangach gan Anogwyr Cynnydd, tiwtoriaid ADY a Hwyluswyr Sgiliau Academaidd. Mae chweched Iâl yn darparu profiad coleg gwahanol o’i gymharu ag aros yn yr ysgol, gan baratoi dysgwyr ar gyfer prifysgol, prentisiaethau neu gyflogaeth.

Mae dysgwyr yn Iâl hefyd yn elwa o gyfleusterau o’r radd flaenaf gan gynnwys labordai STEM arbenigol ac ystafelloedd TG, llyfrgell helaeth, Parth Cynhwysiant, clybiau a chymdeithasau fel dosbarthiadau meistr STEM a Gwobr Dug Caeredin, a chael cyrchu’r gampfa am ddim a’r hwb llesiant ar y safle.

Am ragor o wybodaeth am Senedd Ieuenctid y DU a Wrecsam Ifanc, ewch i Senedd yr Ifanc.

Ewch i www.cambria.ac.uk i weld y newyddion diweddaraf gan Goleg Cambria.