Cyhoeddodd Gyngor Gwirfoddol Lleol Sir y Fflint (CGLlSFf) fod y digwyddiadau blynyddol yn dychwelyd – rŵan yn fwy ac yn well gyda dwy sesiwn i’w cynnal ym mis Hydref eleni.
Bydd y ffair gyntaf yn cael ei chynnal yng Nghanolfan Chweched Glannau Dyfrdwy ddydd Llun 6 Hydref o 11am–2pm, yna yn llyfrgell Llaneurgain ddydd Iau 9 Hydref o 11am–1.30pm.
Mae’r Ffair Wirfoddoli yn rhoi cyfle i fyfyrwyr gwrdd â sefydliadau lleol, darganfod ystod eang o gyfleoedd gwirfoddoli, a dysgu sut y gallan nhw wneud gwahaniaeth gwirioneddol yn eu cymunedau wrth ennill sgiliau a phrofiad gwerthfawr.
Roedd digwyddiad y llynedd yn hynod boblogaidd, gan ddenu mwy na 300 o fyfyrwyr i safle Glannau Dyfrdwy.
Gyda dwy ar y gweill ym mis Hydref, mae CGLlSFf yn disgwyl hyd yn oed rhagor o ymgysylltiad gan fyfyrwyr a sefydliadau gwirfoddol.
“Rydyn ni wrth ein bodd ein bod ni’n cael Ffair Wirfoddoli eto eleni, ac yn ddiolchgar iawn i Goleg Cambria am ddarparu lleoliadau mor anhygoel unwaith eto,” meddai Emily Morgan, Swyddog Datblygu Gwirfoddoli yn CGLlSFf.
“Mae’n gyfle gwych i’n myfyrwyr archwilio swyddi ystyrlon gydag elusennau a grwpiau cymunedol, wrth helpu sefydliadau i gysylltu gyda’r genhedlaeth nesa’ o wirfoddolwyr.”
Ychwanegodd hi: “Mae Bagloriaeth Cymru yn rhoi pwyslais cadarn ar ymgysylltiad â’r gymuned a datblygiad personol, felly mae digwyddiadau fel hyn yn amhrisiadwy wrth ddangos i ddysgwyr sut mae gwirfoddoli’n gallu hybu eu hyder, ehangu eu gorwelion, a rhoi profiad ymarferol iddyn nhw y tu hwnt i’r ystafell ddosbarth.
“Nid yn unig y mae gwirfoddoli yn eu helpu nhw i gael effaith gadarnhaol yn lleol, ond mae hefyd yn cryfhau eu CVs, eu ceisiadau prifysgol, a’u rhagolygon swyddi yn y dyfodol. Rydyn ni’n hyderus y bydd ffeiriau eleni yn fwy ac yn well nag erioed.”
Rydyn ni’n annog sefydliadau sydd â diddordeb mewn cynnal stondin i gadw eu lle cyn gynted â phosibl, gan fod lleoedd yn gyfyngedig ac rydyn ni’n disgwyl iddyn nhw lenwi’n gyflym.
Am ragor o wybodaeth neu i gadarnhau eich presenoldeb, ffoniwch Emily ar 01352 744000 neu anfonwch e-bost at Emily.morgan@flvc.org.uk.
