Bydd ein rhaglenni Tirlunio yn eich ysbrydoli chi i fod yn llwyddiannus wrth feithrin sgiliau technegol, ymarferol a pherthnasol sy’n hanfodol i ddechrau yn y diwydiant eang, deinamig a diddorol hwn. Mae llawer o gyfleoedd am swyddi ledled y diwydiant sy’n rhoi’r cyfle i chi gael gyrfa hir sy’n talu’n dda mewn sector rydych chi’n angerddol amdani.

Os oes gennych chi ddiddordeb mewn dysgu ystod eang o sgiliau, yn amrywio o blannu bylbiau i gontractau adeiladu mawr, ac os hoffech chi symud ymlaen mewn diwydiant sy’n cynnig gyrfaoedd cyffrous fel rheolwr llawrydd prosiectau neu gontractau, ymgynghorydd tirwedd, swyddog coed neu dirwedd awdurdod lleol, neu efallai fel tirluniwr/plannwr hunangyflogedig, tirmon cynorthwyol neu geidwad grin sy’n gweithio ar gyrsiau golff neu stadia chwaraeon, yna mae’r cyrsiau tirlunio yn ddelfrydol i chi.

Mae safle Llaneurgain wedi bod yn cyflwyno cyrsiau tirlunio caled a thirlunio meddal ers dros 50 mlynedd fel canolfan ragoriaeth. Mae ein cyfleusterau wedi datblygu gyda’n hwb tirlunio newydd, gan roi’r cyfle i ni arddangos a hogi amrywiaeth o sgiliau ar un safle, yn ogystal â defnyddio ystâd 90 erw safle Coleg Cambria.

Gallwn hefyd gynnig yr hyfforddiant diweddaraf ar ffurf cyrsiau byr fel chwistrellu, strimio, torri gwair, torri gwrychoedd a thystysgrifau cymhwysedd gyrru tractorau sy’n rhoi sgiliau amhrisiadwy i chi i unrhyw gyflogwr garddwriaeth/ tirlunio yn y Deyrnas Unedig neu’n rhyngwladol.